အာကီးမီးတီး(Archimedes) ၏ သင်္ချာပညာ (287-212 BC)
********************************************
အာကီးမီးတီးသည် သင်္ချာပညာရှင်၊ ရူပဗေဒပညာရှင်၊ လက်တွေ့သိပ္ပံပညာရှင်
နှင့် အင်ဂျင်နီယာတစ်ဦး ဖြစ်ခဲ့သည်။ သူသည် စက်လုံး၊ ဆလင်ဒါ၊ လုံးချွန်တို့
၏ ထုထည်များကို ရှာရာတွင် သင့်တော်သလို အစိတ်အပိုင်းများပိုင်း၍
တွက်ချက်သောနည်းသည် နောင်နှစ်ပေါင်း (၁၈၀၀) ကြာသောအခါ နယူတန်
နှင့် လစ်ဘနစ် တို့ ကဲကုလ ဘာသာတွင် သုံးသောနည်းနှင့် ထပ်တူဖြစ်နေ
သည်ကို တွေ့ရသည်။
သက္ကရာဇ် 212 BC တွင် ဂရိနိုင်ငံတစ်ခုလုံးနီးပါးသည် ရောမတို့၏ လက်အောက်
သို့ ကျရောက်နေပြီဖြစ်သည်။ နောက်ဆုံးကျန်ရှိနေသည်မှာ စီစလီကျွန်း၏
ဆိပ်ကမ်းမြို့လေးဖြစ်သော စီးရာခရုမြို့ဖြစ်သည်။ ဤမျှလောက်သေးသော
မြို့ကလေးကို ရောမတို့သည် နှစ်နှစ်တိုင်တိုင် တိုက်ပြီးမှ သိမ်းပိုက်နိုင်ခဲ့သည်။
ဥရောပတိုက်၏ တစ်ဝက်ကျော်ကျော်ကိုပင် တစ်နှစ်ကျော်လောက်ဖြင့်သိမ်း
ပိုက်နိုင်ပြီး ဤသေးငယ်သော ဆိပ်ကမ်းမြို့လေးကျမှ အဘယ်ကြောင့်
နှစ်နှစ်တောင် ကြာရသနည်း။ အဖြေမှာ အာကီးမီးတီး၏ သင်္ချာပညာဖြစ်သည်။
ရောမလူမျိုးများသည် စီးရာခရုမြို့ကို စစ်သင်္ဘောများဖြင့် ချီတက်လာကြသည်။
မနီးမဝေးသို့ရောက်သောအခါ နေဆယ်စင်းလောက်၏ အလင်းထက်ပင်
ပိုလင်းသော အလင်းရောင်ကြီးတစ်ခုသည် မြို့ရိုးမှ ပေါ်ထွက်လာသည်။
မကြာမီ စစ်သင်္ဘောများ မီးထတောက်လောင်၍ ပျက်စီးသွားသည်။
ဒါဘယ်လိုဖြစ်တာလဲဟု မေးကြသည်။ ကမ္ဘာပေါ်တွင် အပူရှိန်နှင့် အလင်းရောင်
နေထက်ပင် ပြင်းသောအရာ ဘာများဖြစ်နိုင်သနည်း။
စီးရာခရုမြို့ကို တိုက်ခိုက်နေသော ဗိုလ်ချုပ်ကြီး မာစဲလပ်စ်က သတိပြုမိ
သည်မှာ ဤအလင်းရောင်ကြီးသည် သူတို့စစ်သင်္ဘောများ၏ နောက်ကျော
ဘက်တွင် နေရောင်ရှိချိန်တွင် ဖြစ်ပေါ်လာတတ်သည်။ နေ၀င်ချိန်တွင် ထို
အလင်းရောင်ကြီးကို လုံးဝ မမြင်ရချေ။ နောက်ဆုံးတွင် ထိုအလင်းရောင်ကြီး
ပေါ်လာနိုင်သောအချိန်ကို ရှောင်၍ တိုက်ခိုက်ခြင်းအားဖြင့် ရောမတို့သည်
စီးရာခရုမြို့ကို သိမ်းပိုက်နိုင်ပြီး အာကီးမီးတီးလည်း သေဆုံးသွားသည်။
အပျက်အစီးများကြားထဲမှ တွေ့ရှိရသော အထောက်အထားများအရ
အာကီးမီးတီးသည် စီးရာခရုမြို့ကို သူတတ်သော သင်္ချာပညာ၏ အစွမ်းဖြင့်
ရန်သူ့လက်သို့ မကျအောင် မည်မျှကြိုးပမ်းခဲ့သည်ကို တွေ့ရသည်။အချို့
နေရာတွက် ငုတ်တိုင်အကျိုးများ မှန်ကွဲစများကို တွေ့ရသည်။ သို့သော်
မှန်မှတဆင့် နေ၏အလင်းတန်းများ အလင်းပြန်ရုံမျှနှင့် နေထက်လင်းပြီး
သင်္ဘောများကို ထိရုံဖြင့် မီးလောင်အောင် ပူပြင်းသော စွမ်းအင်မျိုးကို မရနိုင်။
မည်ကဲ့သို့ပြုလုပ်သည်ဟူသော သဲလွန်စများကို အာကီးမီးတီး၏ အိမ်တွင်
တွက်ချက်ထားသော မှတ်စုများနှင့် စက်ဝိုင်းနှင့် မတူသော မျဉ်းကွေးပုံများ
တွေ့ရသည်။
ထိုအချိန်က အာကီးမီးတီးတွက်ချက်ထားသော မှတ်စုများနှင့် သူဆွဲထား
သောမျဉ်းပုံများ၏ အကျိုးသက်ရောက်မှုကို မည်သူကမျှ နားမလည်ကြချေ။
ယခု သိပ္ပံနှင့် သင်္ချာတိုးတက်လာသော ခေတ်တွင်သူ၏ တွက်ချက်မှုများနှင့်
ဆွဲထားသောပုံများကို တက္ကသိုလ်တွင် ပထမနှစ်အထိ သင်္ချာယူဖူးသော
ကျောင်းသားကျောင်းသူများပင် နားလည်နိုင်ပါသည်။ အာကီးမီးတီး
ဆွဲထားသောပုံများမှာ ပါရာဗလာ(Parabola) အမည်ရှိသော မျဉ်းကွေးပုံ
ဖြစ်သည်။ သူတွက်ချက်နေသော ညီမျှခြင်းမှာ ပါရာဗလာ၏ ဆုံချက်အမှတ်
ကိုရှာနေခြင်း ဖြစ်သည်။ အကယ်၍ မှန်သေးသေးလေးများကို ပါရာဗလာ
မျဉ်းကွေးအတိုင်း စီထားလိုက်လျှင် ထိုမှန်ကလေးများကို တွေ့ထိသော
နေရောင်ခြည်အလင်းတန်းများသည် ယင်းမျဉ်းကွေး၏ ဆုံချက်တွင်
သွား၍စုဝေးသည်။ ထို့ကြောင့် ယင်းအလင်းတန်းများစုဝေးနေရာသည်
နေ၏ အပူထက် အဆပေါင်းများစွာ ပူပြင်းပြီးမီးလောင်ကျွမ်းစေခြင်းဖြစ်သည်။
ဒေါက်တာခင်မောင်ဝင်း (ဂိမ်းသီအိုရီနှင့် သင်္ချာအတွေးအခေါ် သမိုင်း)
No comments:
Post a Comment